LAOAG CITY – Umabot iti 793 a kwalipkado a persons deprived of liberty (PDLs) ti winaya-wayaan ti Bureau of Corrections (BuCor) sipud Enero 31 agingga iti Pebrero 28 ita a tawen.
Gapu iti daytoy, umaboten iti 19,740 ti pakabuklan a bilang ti nawaya-wayaan iti babaen ti Marcos administration.
Indaulwan ni Justice Secretary Jesus Crispin Remulla ken Bureau of Corrections Director General Gregorio Catapang Jr. ti culmination activity iti 182 a nawaya-wayaan a Persons deprived of liberty iti Bureau of Corrections headquarters iti Muntinlupa City idi Pebrero 28 ita a tawen.
Ginutigot met ni Remulla dagiti nawaya-wayaan a persons deprived of liberty nga usaren da amin a nasursuro da iti uneg ti pagbaludan tapno agbalin a maysa a produktibo a miembro iti bukod da a komunidad.
