LAOAG CITY – Nasurok a 8 million a pisos a machineries ken agri-inputs ti naipaay kadagiti Agrarain Reform Benificiary Organizations wenno ARBOS .
Daytoy ti inpakaamo ni Mr. Vic Ines, Provincial Agrarian Reform Program Officer II iti Department of Agrarian Reform Office ditoy probinsia.
Kunana nga agtul-tuloy iti panagipaayda ti tulong ken panangipapigsa iti relasion kadagiti mannalon ken agtakigikua ti daga ditoy probinsia.
Inbunannagna a dagiti naibunong kadagiti benepisiario ket dagiti nakiddaw babaen iti programa ti Department of Agrarian Reform.
Inpakaamona nga agtultuloy iti panagmonitor da kadagiti agrarian benificiaries nangruna kadagiti agturturong iti opisinada nga adaan ti problema iti daga iti panagtalon.
Malaksid kadagiti machineries ken agri-inputs adda pay ti support services nga idiadiaya iti nasao nga ahensia kas iti panagsanay kadagiti mannalon tapno matulunga da no kasano iti mangpaado iti maapitda kadagiti naibunong a daga kada kuada.
Mainaig iti daytoy, inbatadna nga uray bassit iti pundo ket maikarkarigatan a maikkan ti suporta dagiti mannalon. Kabayatanna, adda ti pakabuklan nga 129 nga Agrarain Reform Beneficiary Organizations a naikkan kadagiti machineries ken pinasingkedanna a naipaayan ti tulong dagiti mannalon ket tapno mapasayaat ti food security ditoy probinsia babaen iti panangadaptar kadagiti programa a mabbalin a makatulong.
