LAOAG CITY – Naipaiman iti Sang Panlungsod ditoy ciudad ti Laoag ti proposed budget para iti 2026.
Daytoy ti inpakaammo ni Konsehal Donald Nicolas, ti chairman ti Committee on Appropriations and Finance ditoy ciudad.
Segun ken ni Nicolas, umabot iti nasuroka P1.5-bilyon a pisos ti nailungalong a pondo ti ciudad para iti sumaruno a tawen.
Gapo iti daytoy, inbatad ni Vice Mayor Rey Carlos Fariñas a rumbeng a mangisayangkat nga insigida ti budget deliberation ti konseho iti sumaruno a lawas tapno maipasa daytoy sakbay nga agngudo ti Oktubre wenno Nobyembre ita a tawen.
Kuna ti bise mayor nga iti umuna nga aldaw a pannakaiyuswat ti budget deliberation ket masapol nga ipresentan ti Local Finance Committee nga idaulwan ti budget officer dagiti nakaipalaon iti 2026 Proposed Budget.
Innayon a kalpasan iti daytoy ket sumaruno a mapaawagan dagiti department heads para iti pannakatingiting sakbay a maaprubaran ti pondo para iti 2026.
