LAOAG CITY – Pinaboran ni Senate President Pro Tempore Panfilo “Ping” Lacson ti panangi-veto ni President Ferdinand “Bongbong” Marcos Jr. iti nasurok a ₱92.5 bilyon nga unprogrammed appropriations iti 2026 General Appropriations Act (GAA).
Segun iti presidente, naipababa ti unprogrammed funds iti babaen ti 2026 General Appropriations Act iti kababaan a lebel sipud pay idi 2019 tapno masigurado a ti pondo ti umili ket mausar a nalawag ken usto para iti national interes.
Mainaig iti daytoy, inpetteng ni Lacson a dua laeng ti makitkita na a rumbeng nga agtalinaed iti listaan ti unprogrammed appropriations nga inpasa ti Kongreso, dagitoy ket ti lokal a suporta ti gobierno para kadagiti Foreign Assisted Projects (FAP) ken ti Revised Armed Forces of the Philippines (AFP) Modernization Program a napateg para iti pannakapadur-as ti ekonomiya ken pannakapapigsa ti seguridad ti pagilian.
Inlawlawag pay ti senaor nga umabot iti nasurok a ₱150.9 bilyon ti nakalusot iti veto, karaman ti ₱97.3 bilyon para iti Foreign Assisted Projects; ₱3.6 bilyon para iti Program Risk Management, ken ₱50 bilyon para iti modernisasyon ti Armed Forces of the Philippines.
Segun ken ni Lacson, ti unprogrammed appropriations ket saan nga aktwal a cash ken mabalin laeng nga usaren kas maiyataday kadagiti espesyal a probisyon, partikular no adda ti sobra a koleksyon iti mapastrek ti gobierno a saan nga aggapo iti buwis, addaan ti kagiddan a nailungalong a pagalaan ti pondo, ken naaprubaran a loan.
Innayon na a ti laeng presidente ti addaan ti bileg a mangaprubar iti panangusar ti unprogrammed appropriations tapno nayunan ti pondo iti programmed appropriations wenno national budget.
Inpetteng pay ti senador a ti panangpaiget ti unprogrammed appropriations ket namonganay iti nagbalin a kontrobersiyal idi 2024 General Appropriations Act, kalpasan a nagnayun ti bicameral conference committee ti dua a probisyon a maibilang a kuwestiyonable.
Karaman ditoy ti pannakaipalubos ti government-owned and controlled corporations (GOCCs) a nangipaay ti gundaway iti pannakaiyakar ti pondo iti Philippine Health Insurance Corporation iti National Treasury, ken ti nalukay a probisyon iti Foreign Assisted Projects no sadinno a mabalin a mausar ti pondo kadagiti saan a rebbeng a proyekto.
Kamaudianan na, inrakurak ni Lacson a maragsakan iti nagbalin a resulta ti panangi-veto ti presidente iti sumagmamano nga unprogrammed appropriations, kas wagas tapno maliklikan ti saan nga umiso a panangusar ti pondo ti umili.
