LAOAG CITY – Inpasigurado ni Police Major Jephre Taccad, ti pannakangiwat ti Ilocos Norte Police Provincial Office a nakasagana dan para iti Barangay ken Sang. Kabataan Elections intono Lunes, Oktubre 30.
Segun kenni Taccad, nakadeploy itan dagiti Quick Reaction Teams kadagiti strategic area wenno dagiti lugar nga addaan ti intense political rivalry tapno masigurado ti kinalged dagiti kantidato, supporters ken dagiti botante.
Kunana nga umabot iti nasurok dua a ribo ti nakadeploy ita iti probinsya a bukbuklen ti Philippine Nationak Police, Marines, Phil. Army, Bureau of Fire Protection, Coast Guard ken dadduma pay a law enforcement agency.
Inbatad na a malaksid kadagiti strategic area nga ayan ti Quick Reaction Teams ket naiget pay ti panagbantay da kadagiti 395 voting center no sadinno dua a pulis ti maideploy iti kada voting center.
Inlawlawag na a malaksid ti panagbantay dagiti kapulisan kadagiti nadakamat a lugar ket adda pay dagiti agsursor nagduduma a lugar ditoy probinsya agingga a malpas ti eleksyon.
Malaksid iti Quick Reaction Teams ket adda pay ti augmentation force manipud iti Regional Office tapno tumulong iti panangpatalinaed ti natalged nga eleksyon.
Innayon na nga adda dagiti maaw-awat na a reports iti bumarbara a sitwasyon iti sumagmamano a barangay isut gapo na nga inbilin ti Provincial Director Police Col. Julius Suriben nga aksyonan da a dagus dagitoy.
Kabayatanna, binalakadan ni Taccad dagiti kandidato ken supporters nga agtanang ken ipakita nga adda ti disiplina iti bagi, kasta met ti panangawat iti agbalin a resulta ti eleksyon.
