LAOAG CITY – Umabot iti 220 a ribu a pisos ti dagup ti kaudian a naipaay ti gobierno probinsial ti Ilocos Norte a tulong pinansial kadagiti umili nga adda ti pimmusay a kameng ti pamiliada.
Indauloan ni Gob. Matthew Marcos Manotoc ti pannakaipaay ti nadakamat a tulong kagiddan ti panangipadanonna iti pannakipagladingitna kadagitoy.
Naammoan a karaman kadagiti naipaayan ti tulong ni Mrs. Brenda Agonoy a pimmusay ti asawana a tricycle driver a ni Mr. Frederick Agonoy iti Brgy. 33 Cabulalaan ti ili a Bacarra gapu iti atake bayat ti panagpaspasadana.
Naipaayan daytoy ti limapulo ribu a pisos manipud iti Metro Ilocos Norte Council wenno MINC gapu ta pimmusay daytoy bayat nga agpaspasada.
Mainaig iti daytoy, inpadanon ni Mrs. Agonoy ti napalaus a panagyamanna ken ni Gob. Matthew Marcos Manotoc gapu iti napintas a programa ti Metro Ilocos Norte Council para kadagiti kameng ti Tricycle Operators and Drivers Association a kas iti asawana.
Inbatadna a nakadakdakkel daytoy a tulong para iti pamiliada nangnangruna ket awanen ti asawana a kangrunaan a mangbibiag iti pamiliada.
Kabayatanna, ginutigot ni Gob. Marcos Manotoc dagiti maseknan a kakailian a naipaayan iti tulong a mangipadanon iti kiddawda iti opisinana nangnangruna no adda pakainaigan iti trabaho wenno pamastrekan a naan-anay a makatulong kadakuada.
Kunana a no adda ti bassit a negosio dagitoy ket mabalinda a gundawayan ti Mataginayon a Progreso Assistance iti babaen ti Micro Small and Medium Enterprise Office.
Malaksid iti daytoy, inpakaammona kadagiti agtaltalon, mangngalap wenno livestock raisers ket mabalinda ti agkiddaw kadagiti kasapulanda a tulong iti babaen ti Agri Ka Dito program.
