LAOAG CITY – Binisita ti Social Security System dagiti walo nga employers ditoy siudad ti Laoag ita nga aldaw, Abril 30 babaen iti panangisayangkatda ti Run After Contribution Evaders wenno RACE Operations.
Daytoy ket kagiddan ti Nationwide Simultaneous Run After Contribution Evaders Operations ken kas paset ti pannakaselebrar ti Labor Day inton bigat, Mayo 1 a napauloan ti “Alay ng SSS para sa mga manggagawa, Serbisyong Mapagkakatiwalaan at Proteksiyong Maaasahan.”
Segun ken ni Mr. Richard Raralio, ti Branch Head II ti nasao nga ahensia, adda ti dua a retail industries, maysa a salon, dua a food industries, maysa a law office, maysa a laundry shop ken maysa a pagadalan ti binisitada.
Inbatadna nga adda ti 105 nga empleado ti maseknan no sadino a mapattapatta a dumanon iti 925 a ribu a pisos ti mabalin a makolektarda.
Inlawlawagna a babaen iti daytoy a ganuat ket tapno masigurado ti panangsurot ken panangipatungpal dagiti employer kadagiti obligasionda a maiyataday iti babaen ti Republic Act No. 11199.
Inpalgakna a seryosoda a kamaten dagiti employer a saan nga agrem-remit kadagiti kontribusionda ken dagiti employer a saanda nga iresrehistro dagiti empleadoda.
Kunana a dagiti maipadalan iti Run After Contribution Evaders ket dagiti employer a saan nga agtultulnog iti panag-report kadagiti empleadoda, saan nga agtultulnog iti panag-remit ti kinaltas a kontribusion ken saan nga husto a panag-remit kadagiti kontribusion.
Mainaig iti daytoy, inpakaammo ni Raralio nga idi pay laeng tawen 2017 a maisaysayangkat ti Run After Contribution Evaders no sadino daytoy metten ti maikatlo a daras iti pannakaiyuswat ti nasao a programa ita a tawen.
Innayonna a dumanonen iti nasurok-kumurang a 300 a milyon a pisos ti nakolektarda iti intero a pagilian sipod nangrugi ti pannakaipatungpal ti nasao a programa.
Kabayatanna, naammoan a no saanda nga iyasikaso dagiti papeles a kasapulan a maiyurnos iti uneg ti 15 nga aldaw ket otomatiko a maipasa dagiti dokumento dagitoy iti Prosecutor’s Office ken mabalinda a mapilaan ti kaso.
