LAOAG CITY – Naarestar ti maysa a retirado a pulis iti Brgy. 19, Napu iti ili ti Badoc.
Daytoy ket kalpasan iti balligi a pannakaisayangkat ti Search Operation babaen ti Provincial Drug Enforcement Unit.
Nabigbig dagiti subject ti operasion a ni Mr. Joy Vergara ken ti live-in partner daytoy a ni Ms. Nita Rondal.
Bayat iti panagsukimat dagiti otoridad iti pagtaengan dagiti subject, nakumpiskarda dagiti tallo a sachet a naglaon ti maatap a shabu ken maysa a granada iti cabinet iti kuarto dagiti ag-live in partner.
Basar kadagiti otoridad, nakitada dagiti iligal a droga iti mismo bag ti live-in partner ti retirado a pulis nga agbalor ti nasurok-kumurang 100 a ribu a pisos.
Malaksid iti daytoy, adda pay ti nakitada a sachet a pagianan ti mapapati a shabu.
Mainaig iti daytoy, bayat ti pannakisarsarita ti News Team ti Bombo Radyo Laoag ken ni Vergara ket naigetna a naglikudan nga agus-usar ken agik-ikot daytoy ti iligal a droga.
Naammoan a nagretiro kas maysa a pulis ti suspek idi 2006 idinto nga idi 2017 ket simmuko daytoy kas drug surrenderee gapu ta mamati a nairaman laeng ti naganna.
Maibasar iti imbestigasion dagiti otoridad, rumrummuar a maipagarup a drug protector iti ili ti Badoc ti maseknan a suspek.
Nadakamat pay a bayat ti panagsukimat dagiti otoridad iti pagtaengan ti retirado a pulis ket awan ti live-in partner daytoy.
Naimatangan met dagiti barangay officials nga indauloan ni Brgy. Chairman Rogelio Dahilig iti nasao a barangay ti pannakaiwayat ti Search Operation.
Kabayatanna, ti nasao a Search Warrant ket manipod iti Regional Trial Court Branch 18 iti siudad ti Batac gapu iti panaglabsingda iti Republic Act No. 9165 wenno ti Comprehensive Dangerous Drugs Act of 2002.
