LAOAG CITY – Inpakaammo ni Dr. Joann Corpuz, ti Schools Division Superintendent iti Department of Education ditoy siudad ti Laoag a dumanon iti nasurok-kumurang a 11 a ribu nga estudiante ti naapektaran iti Alternative Delivery Mode iti baet ti kinabara ti panawen ditoy siudad.
Segun kenkuana, adda ti 29 a pagadalan ditoy siudad ti Laoag ti mangipatpatungpal ti Alternative Delivery Mode no sadino adda ti 9 a pagadalan iti umuna a distrito, lima a pagadalan iti maikadua a distrito, walo a pagadalan iti maikatlo a distrito pakairamanan dagiti amin a secondary schools nga adda ti pakabuklan a 10,898 dagiti naapektaran nga agad-adal.
Inbatadna nga idi Abril 4 ket nangiyisyuda ti DepEd Order maipanggep dagiti pagannurutan iti pannakakanselar ti klase ken trabaho no sumangbay ti natural disaster kas ti panagpukaw ti serbisio ti kuriente ken dadduma pay a kalamidad.
Kunana a babaen iti nasao a pagalagadan ket maikkan ti bileg dagiti School Heads a mangsuspinde ti in-person classes no dagitoy ket makarikna ti nabara a panawen para iti pagsayaatan ti salun-at dagiti agad-adal.
Inlawlawagna a makapaspasarda ti kinapudot ti paniempo gapu iti nangato nga heat index a mairekrekord ditoy siudad ti Laoag.
Innayonna nga adda ti Memorandum ken Advisory ti inpasadan kadagiti maseknan a pagadalan para iti pannakaiyuswat ti Modular Distance Learning.
