LAOAG CITY – Mangiwaras ti National Capital Region Police Office (NCRPO) ti nasurok-kumurang a 8 a ribu a pulis tapno i-secure dagiti nagduduma a lugar idiay Metro Manila iti baet ti deklarasion ti tallo nga aldaw a transport strike ti transport groups pakairamanan dagiti sumagmamano a labor organization.
Inbatad ni National Capital Region Police Office Director Maj. Gen. Jose Melencio Nartatez Jr. a ti deployment ket gagem a maipasigurado ti kinatalged ti publiko kasta pay dagiti saan a sumurot iti transport strike a rugianan ti Pagkakaisa ng mga Samahan ng Tsuper at Opereytor Nationwide ita nga aldaw, Abril 29.
Kunana a naipan iti babaen ti full alert status dagiti kameng ti pulisia kas paset ti contingency plan para iti transport strike.
Iti press briefing, kuna ti Pagkakaisa ng mga Samahan ng Tsuper at Opereytor Nationwide a ti tignay-protesta ket mangipasimudaag ti agtultuloy a panangilabanda kontra iti pannakaipatungpal ti Public Utility Vehicle (PUV) Modernization Program banag a padagsen para kadagiti jeepney operator ken driver gaou ta daytoy ket mangipapilit nga ag-avail dagitoy ti nasurok a dua a milyon a pisos a gatad ti moderno a jeepney.
Mainaig iti daytoy, ti transport strike ket gapu iti Abril 30 a deadline nga intuding ni Presidente Marcos para iti franchise consolidation a maysa a kangrunaan a kasapulan para kadagiti jeepney operator ken driver tapno ituloyda ti prangkisada.
Naammoan a saan a bumaba iti dua a grupo ti mangmangged ti nagkari a makipasetda kas suporta iti Pagkakaisa ng mga Samahan ng Tsuper at Opereytor Nationwide gapu ta dinakamatda a ti Public Utility Vehicle Modernization Program ket mangitunda ti panagngato ti pagplete gapu ta ti panagngato ti pagplete ket isu ti kakaisuna a lohikal a makaigapu no sadino maala dagiti operator ti nangato a binulan nga amortization ken maintenance cost para kadagiti moderno a jeepney.
Inlawlawag ni National Capital Region Police Office Chief Information Officer Lt. Col. Eunice Salas nga iwarasda ti amin nga available a lugan tapno tulungan dagiti commuters a ma-stranded iti transport strike nangruna kadagiti oras ti rush ita a Lunes, Abril 29 ken inton bigat, Martes, Abril 30.
Kabayatanna, adda ti 90 nga available a lugan ti National Capital Region Police Office a naka-standby tapno mangipaay ti libreng sakay kadagiti umili a maapektaran ti transport strike.
