LAOAG CITY – Mapatta-patta nga umabot iti nasurok kumurang nga innem a milyon a pisos ti nakumpiskar dagiti otoridad iti maipagarup a vote buying ditoy probinsya.
Daytoy ti inpakaammo ni PMaj. Jephre Taccad, ti pannakangiwat ti Ilocos Norte Police Provincial Office.
Inbatad ni Taccad a ti nasao a kantidad ket nakumpiskar kadagiti nagduduma nga indibidual manipod iti ili ti Piddig, Sarrat, Bacarra ken ditoy siudad ti Laoag.
Kuna na nga iti agdama ket manarimaan ti imbestigasyon ti kapulisan seknan iti maipagarup a vote buying ken nu mapaneknekan a pudno ket mapilaan dagitoy iti maiyannatop a kaso.
Kabayatanna, immunan nga inpakaammo ni Taccad a maysa a barangay kagawad ditoy siudad ti naan-anayen a napilaan ti kaso gapu iti maipagarup a panaggatang ti butos.
Inbatad na nga umabot iti walo a ribo a pisos ti nakumpiskar manipod iti daytoy.
