LAOAG CITY – Umabot iti nasurok nga 60 a migrants ti mapagam-amkan a pimmusay kalpasan a naarinebneb ti nagluganan da a bangka iti baybay a paset ti Libya.
Daytoy ti inrakurak ti International Organization for Migration (IOM).
Inbatad ti United Nations Agency a ti bangka ket naggapo iti ciudad ti Zuwara ken adda karga na a 86 a tattao.
Nupay kasta, bayat ti panaglayag ti bangka ket sinaplit ti dakkel a dalluyon a nangitunda ti pannaka-arinebneb na no sadinno nga agpapan ita ket saan pay a nabirukan dagiti 61 a migrants a pakairamanan dagiti ubbing a mapapati a pimmusayen.
Ti Libya ket maysa kadagiti main departure points para kadagiti migrants a manggandat a bummallasiw iti Mediterranean tapno makastrek iti Europa.
Kabayatann, inbatad ti International Organization for Migration a mapatta-patta nga addan ti nasurok a 2,200 a tattao ti natay gapu iti pananggandat da a bumallasiw iti Europa ita laeng a tawen.
