LAOAG CITY – Inbatad ni retired PLt. Col. Amador Quiocho, ti manager iti Ilocos Norte PNP Ladies and Civilian Employees Cooperative a sipud nagakem iti nasao a posisyon ket adda dagiti iregularidad a naduktalan iti uneg ti kooperatiba.
Kuna na a babaen iti naiyuswat nga imbestigasyon, iti nasurok 3.5 milyon a pisos ti naduktalan a saan a nabayadan a loan ti miembro ti board of directors a ni Pol. Executive Msgt. Heidi Mabanag.
Inpakaammo na a daytoy ket patta-patta a nautang ti pulis manipod idi 2010 agingga iti tawen 2020.
Immuna iti daytoy, inlawlawag ni Quiocho a ti panagutang iti kooperatiba ket masapol a maisubli iti nagtulagan a tawen a panagbayad.
Mainaig iti daytoy, kuna ni Quiocho a nu mapaneknekan a nagaramid kadagiti dummy accounts ni Mabanag tapno makaala ti loan ket adda ti pagsungbatan na iti linteg.
Inpakaammo na nga addan ti administrative case a naipila iti PNP Internal Affairs Servis (PIAS) ken reklamo a naipila iti PNP ditoy siudad ti Laoag.
Kuna na nga aniaman nga agbalin a resulta ket ti piskalya ti makaammo a mangtngiting iti kaso daytoy.
Nagpanawagan ti manager kadagiti pada na a miembro iti kooperatiba a saan na nga ipalubos a saan a mausar a naimbag ti kwarta da.
Naamoan a ti maysa a miembro ti cooperative ket mabalin ti maysa a milyon a pisos a mabulod iti kooperatiba.
Kabayatanna, nagkedked a nangipaay ti komento ni PMsgt. Mabang iti alegasyon kontra kenkuana.
