LAOAG CITY – Adda manen ti nasurok a sangaribo a Pilipino a nakabase iti Lebanon ti agkalikagom nga agawid ditoy Pilipinas iti baet ti kumarkaro a tensyon iti Middle Eastern.
Daytoy ti inrakurak ni Department of Foreign Affairs (DFA) Undersecretary Eduardo de Vega.
Immunan nga inpakaammo ni de Vega nga addan ti pakabuklan a 356 nga indibidwal ti na-repatriate.
Basar iti datos, adda ti sumuruk-kumurang a 11 ribo a Pilipino idiay Lebanon a ti sumagmamano ket saan a dokumentado.
Segun ken ni de Vega, ado paylaeng dagiti Overseas Filipino Workers idiay Lebanon a saan nga interesado nga agbakwit wenno pumanaw iti nadakamat a pagilyan isut gapuna nga ad-adda pay a pinapigsa ti embahada ti panawagan na kadagiti Pilipino iti lugar.
Maipalagip a nangiparuk-at ti advisory ti Embahada ti Pilipinas iti Lebanon idi rabii ti biernes kadagiti Pilipino a dagus a pumanaw iti nadakamat a pagilian bayat a silulukat paylaeng dagiti erupuerto iti baet ti tensyon iti nagbaetan ti Lebanon-based Hezbollah ken Israel.
Binalakadan ti embahada ti amin a Filipino nationals iti Lebanon nga unaen ti seguridad da isut gapuna a pumanaw dan iti pagilian iti kabiita a panawen.
Kabayatanna, nabalakadan dagiti saan a makapanaw idiay Lebanon nga agbakwit paylaeng iti nataltalged a lugar iti ruwar ti Beirut, South Lebanon, ken Bekaa Valley.
