LAOAG CITY – Mabalin a maapektaran ti agarup 108,767 nga ektaria a talon ditoy pagilian gapu iti agtultuloy nga epekto ti Bagyo Julian, maibasar iti datos manipud iti Philippine Rice Information System.
Segun iti ahensya, ti kadakkelan a porsiento ket manipud iti rehion ti Cagayan Valley a mabalin a dumanon agingga iti 51,864 nga ektaria.
Sumaruno ti Ilocos Region nga addaan iti mapattapatta a 46,911 nga ektaria ti mabalin a maapektaran, 25,731 nga ektarya iti Ilocos Norte idinto a 21,180 nga ektaria iti Ilocos Sur.
Iti Cordillera Administrative Region, manamnama a maapektaran ti agarup sangapulo ribu nga ektaria a talon ti pagay.
Inbatad pay Philippine Rice Information System a mapatta-patta nga 4,238 nga ektaria iti kataltalonan ti pagay ti madadael iti probinsia ti Abra ken 5,754 nga ektaria iti probinsia ti Apayao.
Kabayatanna, basar iti agdama a datos nga iggem ti Philippine Rice Information System, kaaduan kadagiti madadael a pagay ket adda iti ripening stage wenno dandanin maapit.
