LAOAG CITY – Umaboten ti 1,786 nga aftershocks sipud idi aldaw ti Domingo kalpasan ti magnitude 7 a gingined a timmama iti Tayun, Abra idi Hulyo 27.
Iti ekslusibo a pannakinnuman ti Bombo Radyo Laoag kenni Mr. Benz Rodriguez, science research specialist iti Phovolcs, gagangay laeng a maaddaan ti aftershock kalpasan ti napigsa a gingined gapu ta kasapulan nga agsubli iti dati a posisyon ti nagkuti iti uneg ti daga.
Kuna na a possible nga agpaot ti gingined iti sumagmamano nga aldaw agingga nga umabot ti makalawas.
Inbatad ni Rodriguez a ti kapigsaan a naimaldit a panagdayyeg ket ti Intensity 5 a maibilangen a napigsa daytoy no sadinno a marikna dagiti tattao ken uray dagiti matmaturog.
Mainaig iti daytoy, inlawlawag na a possible a nalukneng iti uneg ti daga iti probinsya ti Abra gapu ta addaan daytoy ti nalawa a karayan.
Kuna na nga ad-adda a napigsa ti marikna a panagdayyeg no naluklukneng ti lugar.
Innayon ni Rodriguez a saanen a maliklikan a makapasar ti napipigsa a gingined no adda iti sakop ti maibilang a pacific ring of fire, kas iti Pilipinas.
Nagimbestigaren ti Phivolcs-QRT iti epicenter ti magnitude 7 a gingined tapno makaipaay da pay ti naan-anay a detalye ti sitwasyon para ti publiko.
Pakairamanan dagiti nagreggaay a daga, liquefaction, ti crown wenno kangatuan a paset ti earthquake-induced landslides iti Sitio Amianan (Cagaban), Brgy. Talogtog, Dolores, Abra.
