LAOAG CITY – Nagpanawagan ni Senior Citizen Party-list Representative Rodolfo “Ompong” Ordanes kadagiti otoridad a siguradoen a maawat dagiti natataengan a balod a saan a naikkat ti maiyannatop a pension ken benepisio.
Inallukoy ni Ordanes ti Department of Social Welfare and Development (DSWD), Department of Justice (DOJ), Bureau of Jail Management and Penology (BJMP) ken Bureau of Corrections (BuCor) nga ipangpangruna ti pannakairaman dagiti natataengan a balod kadagiti senior citizen welfare programs.
Kas Chairman ti House Committee on Senior Citizens, kangrunaan nga immapela ni Ordanes da Department of Social Welfare and Development Secretary Rex Gatchalian ken Justice Secretary Crispin Remulla nga iraman dagiti natataengan a balod iti pension program ti indigent seniors ken irehistroda iti PhilHealth, ti state health insurer.
Inpettengna a dagiti natataengan a balod kadagiti lokal a pagbalodan ket mabalin nga agbalin a kualipikado para kadagiti allowance ti local government unit (LGU) para kadagiti natataengan gapu ta dagiti Local Government Unit ket asideg kadagiti detention facility.
Innayon ni Ordanes a dagitoy a benepisio ket dakkel a makatulong kadagiti natataengan a balod ken dagiti pamiliada gapu iti limitado nga allowance nga ipapaay ti Bureau of Jail Management and Penology ken Bureau of Corrections.
