LAOAG CITY – Nabirukan ti pimmusayen a kaipasngay a maladaga a babai iti uneg ti maysa a bag a naibelleng iti asideg ti terminal ti para Badoc iti paset ti Barangay Tabug iti ciudad ti Batac.
Daytoy ti kinumpirmaran ni Police Lieutenant Col. Adrian Gayuchan, ti chief of police iti nasao a ciudad.
Segun ken ni Gayuchan, adda ti naidumduma nga angot a naangot ti maysa a residente nga asideg iti lugar no sadinno nga iti panagsukisok na ket nakita na ti eco bag a nakaipanan ti kaipasngay a maladaga ngem awanen ti biag ti ubing.
Inpakaammo ni Gayuchan a basar iti pananginspeksyon ni Doctor Carlos Maruquin iti Mariano Marcos Memorial Hospital and Medical Center iti ciudad ti Batac iti nasao a maladaga, 9 a bolanen ti maladaga ken nabara paylaeng daytoy idi nakita iti nadakamat a lugar.
Mainaig iti daytoy, inbatad ni Gayuchan a naipaayan ti nasayaat a pannakaitabon ti maladaga gapu ta inpalubos ni Mayor Albert Chua iti kamposanto iti ciudad.
Kabayatanna, inrakurak ni Gayuchan a kiniddaw da iti lokal a gobiero iti ciudad ti panangrebisar da ti CCTV camera a nakaimuntar iti crossing ken mangnamnama da a makaala da ti lead no siasinno ti napan nangibelleng ti bag a nagyanan ti maladaga iti lugar.
