LAOAG CITY – Inlawlawag ni Police Master Sgt. Meynard Buguina iti PNP Sarrat, mainaig ti panangipila da ti kaso a murder kontra kenni Conrado Castillo Jr residente iti Brgy. Suyo iti ili ti Dingras kalpasan a naitudo a suspek ti pannakapapatay ni Rodante Corrales a taga Brgy. Medina iti ili ti Dingras.
Natay ni Corrales kalpasan a pinalto-paltogan ti riding in tandem suspect iti paset ti C5 road iti Brgy. 20 San Jose iti ili ti Sarrat iti kallabes.
Simmaruno ni Castillo a pimmusay kalpasan a pinalto-paltogan met ti riding in tandem iti Brgy. Guerero iti ili ti Dingras.
Segun kenni Buguina, naitudo ti witness a ni Castillo ti maysa a suspek ti pannakapapatay ni Corrales itay kallabes.
Kuna na a bayat nga adda da iti tianggi ti witness, nakita na dagiti suspek a maipagarup nga iyur-uray da ti biktima ken naikkat da dagiti helmet da.
Inbatad ni Buguina nga akma iti palawag ti witness ken dagiti immun-una a witness da.
Saan pay a maamuan ti motibo ti krimen a nakatayan ni Corrales ken no adda ti pakainagan iti pannakapapatay ni Castillo iti ili ti Dingras.
Kuna na agtultuloy iti imbestigasyon da kas iti cartographic image ti suspek ken dadduma pay a wagas ken anggulo ti panagimbestigar.
Innayon ni Buguina a posible a mailasin pay ti witness ti kadua ni Castillo no makita na daytoy.
Kabayatanna, immunan nga inbatad ni Police Capt. Carlo Abing, hepe ti PNP Sarrat a naipila ti kaso a murder kontra kenni Castillo iti Provincial Prosecutor’s Office kas pannakaipaay ti inisyal nga hustiya iti biktima ti pammaltog iti ili nasao nga ili.
Inlawlawag ni Atty. Ferdinand Ignacio a maibilang a nalpasen ti kaso no pimmusay ti naitudo a suspek kas kenni Conrado Castillo a maipagarup a nangpatay kenni Rodante Corrales itay kallabes.
Kuna na a mabalin a mangipila ti kaso ti PNP kontra iti kadua ti suspek no adda dagiti makaumanay nga ebidensya gapu ta adda ti naituding a tawen iti panagipila ti kaso kas iti murder.
Daytoy ket kalpasan a nangipila pay laeng ti kaso a murder ti PNP Sarrat kontra iti napapatay a ni Castillo gapu ta naitudo a suspek iti pannakapapatay ni Corrales
Segun kenni Ignacio, mabalin a mangipila ti kaso ti pamilya ti pimmusay a naakusaran.
Nupay kasta, inbatad ni Atty. Ignacio a makwestiyonaran ti inpila ti PNP a kaso iti piskalya ken masapul nga ilawlawag da dagiti ebidensya ken dadduma pay mainaig ti imbestigasyon da.
No bilang kayat iti pamilya dagiti dua a pimmusay a maamuan ti pudpuno, kinumpirmaran ni Ignacio a mabalin da a dumawat ti kopya dagiti naipila a dukomento ken makita dagiti ebidensya.
Possible a mapilaan met ti kaso ti nagwitness ken saan laeng a libel ti sanguen na.
