LAOAG CITY – Awan makita ni Dr Manuel Andres, Municipal Health Officer ti ili ti Bacarra a “foul play” ti pannakatay ti agnagan ti Rene Boy Ramil y Cordero, agtawen ti 31 awanan ti asawa, agtaltalon ken residente iti Brgy 18 Abkir, Vintar, Ilocos Norte.
Daytoy ti inbatad ni P/C/Inps. Allan Emerson Dauz, Hepe ti Pulisya ti nasao nga ili kalpasan a kinita da ti lugar a nakabirukan a natay ken awan ti nakita a mabalin a nakilaban.
Segun ken ni Dauz, idi rabii ti Oktubre 11 ket nagtalaw ti biktima ket nagturong iti Brgy 11 Sta Filomena, Bacarra, Bacarra tapno makiminatay.
Nupay kasta, iti bigat ti Oktubre 12 ket nakita ti agnagan ti Romulo Fernandez y Salodes, agtawen ti 65, naasawaan ken residente ti Brgy 18 Abkir, Ilocos Norte a natayen.
Rumrumuar a ti makagapu iti pimmusayan ti biktima ket gapu iti makunkuna a myocardial infraction wenno naatake.
