LAOAG CITY – Natay ti maysa lalaki kalpasan a nagdinnungpar ti maysa a motorsiklo ken truck idiay Barangay 13 San Gabriel iti ili ti Bacarra.
Nabigbig ti biktima a ni Jonard Agonoy y Acido, agtawen ti 28, naasawaan, nangiturong ti motorsiklo ken residente iti Brgy 20 Pulangi, Bacarra; idinto a ti nangiturong ti truck ket ni Wynson Catal y Abrigo, agtawen ti 24, baro, ken residente iti Brgy 12 Maab-abac, iti ili ti Piddig.
Segun ti imbestigasyon ti PNP Bacarra, bayat nga agpapalaud a direksyon ti nasao a motorsiklo a minaneho ni Agonoy ket in-overtakan na iti pampasahero a bus a nagresulta ti pannakaidungpar na iti sumungad a truck.
Gapu iti daytoy, naipasirok ni Agonoy iti truck ket naulod ti sumagmamano a metro.
Dagus a naitaray ti Bacarra Medical Center ti biktima ngem naideklara a dead on arrival.
Agtultuloy pay laeng ti imbestigasyon dagiti otoridad mainaig ti napasamak nga insidente.
