LAOAG CITY – Natay ti maysa a babai kalpasan a nakadinnungpar ti nagluganan da a traysikel ti maysa a kotse iti Barangay Sta. Maria ditoy ciudad ti Laoag.
Nabigbig ti biktima a ni Maureen Valencia Tabustan, residente iti Barangay Solquiano iti ili a Dingras.
Iti inisyal nga imbestigasyon ti PNP-Traffic Division, bayat nga agpapa-amyanan a direksyon iti by-pass road ti kotse nga inturong ni Jose Bartolome Tungpalan Jr., agtawen iti 48 ken taga Barangay 38, Saguil iti ili a Bacarra ket nakadinnungpar na ti traysikel nga inturong ni Jeffrey Aguinaldo Lagrio, agtawen iti 39, awanan ti asawa, awanan ti lisensya nga agmaneho.
Naamoan a kadwa ni Lagrio ni Tabustan ken ti anak na a lalaki nga agtawen iti uppat.
Nagsagaba dagiti nakalugan ti traysikel iti sugat iti nagduduma a paset ti bagi ken iti pannakaitaray da iti Governor Roque Abl;an Senior Memorial Hospital (GRASMH) ket naideklara ni Tabustan a dead on arrival.
Iti pannakaipadalan ni Lagrio iti Alcohol Breath Analyzer ket nagpositibo a nakainom ti nasanger idinto a negatibo ti resulta ti nangiturong ti kotse a ni Tungpalan.
Iti agdama, agtultuloy ti naiget nga imbestigasyon dagiti otoridad mainaig ti napasamak nga insidente.
