LAOAG CITY – Napilaanen ti kaso a panaglabsing iti Presidential Decree 1602 dagiti natiliw a dua nga indibidual a nagsusugal iti maysa a minatayan iti Barangay Puttao iti ili ti Solsona.
Daytoy ti kinumpirmaran ni Police Captain Randy Damo, ti chief of police ti Philippine National Police iti nasao nga ili.
Segun kenni Damo, dagiti dua a natiliw ket nainquest idi malem kalman ken manamnama nga agpiyansa ti 30 ribo a pisos para iti temporaryo a pannakawaya-waya da.
Kabayatanna, inlawlawag ni Damo a dagiti tallo nga indibidual a a nakataray ket napilaan babaen iti regular filing.
Inpetteng na a no rumuar ton ti warrant of arrest dagitoy ket matiliw to met laeng dagitoy.
Maipalagip a dagiti dua a natiliw a lallaki ket ni Nestor nga agtawen ti 56 ken ni Clemente nga agtawen met ti 47, idinto a dagiti nakalibas ket isuda Virgilio, Esteban ken Jeffrey, agpapada a residente iti Barangay Puttao.
Nakumpiskar dagiti otoridad ti 5,025 pesos a pusta, baraha, table cloth, lamisaan ken pito a tugaw.
