LAOAG CITY – Ado dagiti natiliw nga aglaklako ti pebbles iti igid ti kalsada iti paset ti Barangay Caroan iti ili ti Pasuquin.
Daytoy ti inpakaammo ni Barangay Chairman George Ragonjan iti nasao a barangay.
Inbaga na a nangiyuswat ti sorpresa a panaginspeksyon iti nadakamat a lugar dagiti kameng ti Philippine National Police (PNP) ken ni Konsehal Armando Aguinaldo, chairman ti Committee on Laws iti ili ti Pasuquin kadwa da dagiti sumagmamano nga agpapaay ti gobierno probinsyal.
Kuna na a ditoy a naduktalan da nga adda dagiti aglaklako ti pebbles iti igid ti kalsada.
Innayon na a nangiyuswat dagiti maseknan ti sorpresa a panaginspeksyon iti lugar gapu ta awan pulos ti maipakita a permit dagiti aglaklako ken kanayun a makitkita ti panaglaklako da ti pebbles iti national road.
Naamoan a namulta dagiti natiliw nga illegal nga aglaklako ti peebles iti saglilima ribo a pisos.
