LAOAG CITY – Natiliw dagiti 6 nga indibidual idinto a dua ti nakalibas iti naisayangkat nga anti-illegal gambling operation iti balay ti maysa a doktor iti Balintawak Street iti Brgy. 9 ditoy ciudad ti Laoag.
Basar kadagiti otoridad, karaman kadagiti natiliw ket agtawen ti 69, balo; agtawen ti 73, awanan ti asawa; agtawen ti 67, balo; agtawen ti 53, awanan ti asawa, construction worker; agtawen ti 54, naasawaan, awanan ti trabaho; agpapada dagitoy a residente ditoy ciudad ti Laoag.
Naamoan a nagresponde a dagus dagiti otoridad kalpasan a naireport kadakuada nga adda dagiti agsusugal iti lugar no sadinno a naaktwan da dagiti suspek nga agay-ayam ti Mahjong.
Nakumpiskar dagiti otoridad iti Table 1 ti 144 a pedaso ti Mahjong tiles, uppat a tugaw, maysa a lamisaan , maysa a plastic bowl nga addaan ti 19 a pedaso ti plastic chips ken ti maipagarop a pusta dagiti suspek a 755 a pisos.
Naala met iti Table 2 ti 144 a pedaso ti Mahjong tiles, uppat a tugaw, maysa a lamisaan, dua a plastic bowl nga addaan ti 19 a pedaso ti plastic chips, maysa a 7.5 litres plastic storage box ken ti maipagarop a pusta dagiti suspek a 2,841 a pisos.
Iti agdama, nagtalinaed iti kustodyar ti pulisya dagiti suspect ken dagiti nakumpiskar a paraphernalia.
Maisagsaganan dagiti dokumento a kasapulan para iti maipila a reklamo kontra kadagiti suspek.
