LAOAG CITY – Nakairekord ti saan nababbaba iti lima ti natay iti National Kidney Transplant (NKTI) gapu iti leptospirosis, kalpasan ti nagsasaruno a lawas a panagtudo ken panaglayus gapu iti Habagat.
Basar iti datos ti ospital, manipud idi Hunio, umaboten iti 19 a kaso ti leptospirosis ti nairekordda no sadinno ket ti naudi a biktima ket natay kalpasan a kimmaro ti kondisionna a nangitunda ti pulmonary hemorrhage wenno panagdara iti barana.
Segun ken ni National Kidney Transplant (NKTI) nephrologist Dr. Arlene Lamban-Crosson, ado dagiti pasiente nga agturturong iti ospital nga addaan ti nakaro a kaso gaputa saanda a makarikna ti sintomas a rason ti panagkaro ti sakitda sakbayda nga agturong iti balay pagagasan.
Mainaig iti daytoy, inlawlawag ni Crosson a karaman kadagiti umuna a sintomas ket ti pananggurigor, panagsakit ti bagi ken ti panaglabbaga ti mata.
No kumaro, mabalin a makapasar ti panag-yellow ti kudil wenno mata, panagsabali ti maris ti isbo, panagbaba ti isbo ken panaguyek ken panagsarwa ti dara.
Kabayatanna, iti San Lorenzo Hospital, umaboten iti 50 a kasoda ti leptospirosis, pakairamanan ti 24 a baro a positibo iti uneg laeng ti 24 nga oras, ken idinto a 2 ti nairekord a natay.
Gapu iti daytoy, nagballaag dagiti doktor a mabalin a saan pay a nairekord ti kangatoan a bilang dagiti kaso gapu ta mabalin nga agbayag ti dua agingga 30 nga aldaw ti incubation period ti leptospirosis.
