LAOAG CITY – Addan iti kangitingitan ti panagsagsagana ti National Movement of Young Legislators wenno NMYL para iti panangisayangkat da iti maikadua a “gala night”.
Segun ken ni Sang. Panglungsud Member Roque Benjamin “RB” Ablan ti siudad ti Laoag, napagnunumoan da iti NMYL Ilocos Norte Chapter nga idadauloan ni Senior Sang. Panlalawigan Member Matthew Joseph Marcos Manotoc nga iyuswat da manen ti nasao nga aktibidad tapno maitultuloy dagiti narugiandan a programa ken proyekto.
Imbatadna a kangrunaan ditoy ti panangipaay da ti “educational assistance” kadagiti nakukurapay ngem nalalaing nga estudiante.
Inbunannagna a maisayangkat ti nasao nga aktibidad intono Oktubre dose iti Ilocos Norte Centennial Arena.
Inlawlawagna nga iti umuna a gundaway a panangiyuswat da iti nasao nga aktibidad ket 250 laeng ti pinuntiria da nga inimbitaran.
Nupay kasta, kunana nga iti daytoy a gundaway ket puntiria ti mangawis iti sanga ribu a makipaset iti “fund raising event” ti grupo da.
Innayonna a babaen iti daytoy ket ad-adu pay nga agtutubo ditoy Ilocos Norte ti matulungan da.
