LAOAG CITY – Kinumpirmaran ni Miss Lorine Rieta iti Department of Science and Technology (DOST) a manarimaan ti pannakaisayangkat ti national nutrition survey ditoy probinsya.
Ti survey ket iyus-uswat dagiti kameng ti FNRI wenno Food and Nutrition Research Institute.
Inbalakad ni Rieta kadagiti umili a no adda ti mapan a kameng ti FNRI iti lugar da ket masapol a makikooperar ket ited da ti pudno a datos dagiti annak da.
Inlawlawag na a dagiti datos a maukkon dagiti maseknan ket isu ti pagibasaran da para iti maaramid a development plan.
Segun ken ni Rieta, ti survey ket nangrugi pay laeng a naiyuswat idi 1978 ken maar-aramid daytoy iti kada lima a tawen.
Innayon na naimandar pay iti FNRI a masapol nga agsukisok da no ania ti makagapu ken epekto dagiti nakurang ti timbang na nga ubbing.
Kuna ni Rieta ti resulta ti survey nga isaysayangkat ti FNRI ket isumitir da iti opisina da ken isudan ti makaammo a mangisumitir kadagiti maseknan nga ahensya ti gobierno.
