LAOAG CITY – Manamnama a malpas ti House Committee on Basic Education and Culture ti panangtalantanda iti nailungalong a gakat a gagem a mangputar ti maysa a national student allowance program iti umuna a quarter ti tawen 2026.
Daytoy ket maysa a napateg nga addang tapno matulungan dagiti estudiante nga agkasapulan ti pinansial a suporta.
Inbatad ni Pasig Representative Roman Romulo, adda pay dagiti sumagmamano a napapateg a datos a kasapulan nga ukkonen ken adalen sakbay a naan-anay nga ipatungpal ti nasao a programa.
Karaman kadagiti kasapulan pay a maammoan ket no ti programa ket aggigiddan a maipatungpal kadagiti amin a pampubliko a pagadalan ken pribado nga institusion iti intero a pagilian.
Maysa pay a napateg a konsiderasion ket no amin nga estudiante ket otomatiko a mairaman ken makaawat ti allowance iti babaen daytoy a programa wenno no addaan kadagiti partikular a kualipikasion a kasapulan a solbaren.
Nakailanad iti mismo a gakat a ti tunggal estudiante ket makaawat ti saan a bumaba iti ₱1,000 nga allowance iti kada school year.
Daytoy a gatad ket mabalin pay a manayonan depende no mano ti pundo nga available para iti nasao a programa iti kada tawen.
Daytoy a tulong pinansial ket nakapatpateg para iti inaldaw-aldaw a kasapulan dagiti estudiante kas ti taraon, transportasion ken dagiti kagamitan iti pagadalan nangruna ket naruay nga agtutubo ditoy pagilian ti mapilpilitan nga agsardeng iti panagadalda gapu iti nakaro a kinarigat iti panagbiag a sangsangoenda.
