LAOAG CITY – Inpakaammo ti National Unity Party (NUP) ti intensyon na a mangipila ti Verified Ethics Complaint iti House Committee on Ethics and Privileges kontra iti dati nito a miembro a ni Rep. Francisco “Kiko” Barzaga.
Daytoy ket gapo kadagiti tignay ni Barzaga a mangdaddadael iti imahen ti House of Representatives ken iti talek ti publiko kadagiti demokratiko nga institusyon.
Nadakamat iti reklamo dagiti uppat a nagibasaran da iti addang kas iti panaglabsing iti House Code of Conduct Republic Act No. 6713 – Code of Conduct and Ethical Standards for Public Officials and Employees; saan nga etikal nga addang a posible a manglsalungasing iti Article 142 ti Revised Penal Code (Inciting to Sedition) ken ti ar-aramiden na a makaperdi iti interes ti serbisyo publiko.
Segun iti National Unity Party, no ti maysa a miembro ti Kamara ket arig na manggutgutigot iti kinaranggas babaen kadagiti panagsasao na, dadaelen na met ti integridad ti institusyon a nabayagen a protprotehiran ti Kamara.
Inbatad ni Deputy Speaker Ronaldo Puno a saan a simple a teknikal a panaglabsing daytoy gapo ta ti Kamara ket nasken met nga irespeto ti publiko.
Kuna pay ti National Unity Party a ti Committee on Ethics and Privileges ket nabukel tapno mangsolbar iti kasytoy a kaso kageddan ti panangirakurak na a kumpyansa da a masurot ti presoso para iti dignidad ti Kongreso.
Ti National Unity Party ket bukbuklen ti 43 a miembro iti House of Representatives.
