LAOAG CITY – Balligi ti pannakaiyuswat ti National Voluntary Blood Services ditoy siudad ti Laoag.
Segun ken ni Mrs. Imelda Jacinto, Blood Service Coordinator ti City Health Office, maisaysayangkat daytoy iti kada kuarter babaen iti panangidonar ti dara dagiti Barangay Health Workers, Non-Government Organizations ken dadduma pay.
Inbatadna a babaen iti daytoy a bloodletting activity ket matulungan dagiti pasiente iti ospital nga agkasapulan ti dara.
Kunana a napateg ti pannakaiyuswat ti bloodletting activity kadagitoy a panawen gapu ta agkurkurang ti suplay ti dara tunggal ber months.
Innayonna a ti nasao nga aktibidad ket nagbibinnuligan ti Philippine Red Cross – Laoag Chapter ken Mariano Marcos Memorial Hospital and Medical Center iti siudad ti Batac.
