LAOAG CITY – Rinugianen ti Nationalist People’s Coalition (NPC) ti panagsasarita seknan iti panangikkat ken ni suspended Bamban, Tarlac Mayor Alice Guo kas miembro ti partido.
Saytoy ti nagbalin a rekomendasion ni Senador Sherwin Gatchalian, dagiti kameng ti Nationalist People’s Coalition advisory council, gapu iti pannakairaman ni Guo kadagiti illegal nga aktibidad ken sindikato iti Philippine Offshore Gaming Operators wenno POGO ken tapno mataginayon ti integridad ti partido.
Segun ken ni Gatchalian, iti sumaruno a sumagmamano a lawas ket puntiriada a pagsasaritaan daytoy inton agtataripnong ti konseho.
Umannamong met ni Senador Loren Legarda, a miembro met iti konseho a maikkat ni Guo iti Nationalist People’s Coalition.
Inbatad na nga usaren da dagiti ebidensia anaurnong bayat ti imbestigasyon ti Senado tapno mapaksiat ni Guo kas kameng ti Nationalist People’s Coalition.
Kabayatanna, patien ni Gatchalian nga adda umdas a rason tapno maikkat ni Guo, nangruna ta mapagduaduaan amin dagiti dokumento a pakainaigan ti nagan ti Mayor.
