LAOAG CITY – Inpatungpal ti Taliban idiay Afghanistan ti nationwide shut down ti telecommunications, sumagmamano a lawas kalpasan a rinugianda a putden dagiti fibre-optic internet connections tapno malapdan ti aw-awaganda nga imoralidad.
Iti agdama, mapaspasaran ti pagilian ti total connectivity blackout basar iti report ti internet watchdog.
Basar iti report, napukaw metten ti kontak kadagiti nagduduma nga opisina iti kabisera a Kabul, agraman ti serbisio ti mobile phone kasta met a napukaw ti mobile internet ken dadduma pay iti intero nga Afghanistan.
Malaksid iti daytoy, uray dagiti eropuerto idiau Kabul ket naapektaran.
Kabayatanna, kuna ti Taliban nga addan to met laeng ti alternative route para iti internet access ngem saanen a nanagipaay ti dadduma a detalye.
Manipud idi naagawda ti turay idi 2021, adon dagiti inpatungpal ti Taliban a restriksion a maitunos iti Islamic Sharia law.
