LAOAG CITY – Inlawlawag ni Engr. Roy Tomas, ti City Engineer ditoy ciudad ti Laoag a kasapulan ti eksperto a manganalisar iti nauram a parte ti ME shopping center.
Daytoy ti nagbalin a balakad ni Tomas iti agtagikua iti nasao a pasdek negosyo kalpasan ti napasamak nga uram.
Segun kenni Tomas, kasapulan pay dagiti apparatus wenno mangala da kadagiti parte ti pasdek a nauram ken dumalan iti eksaminasyon iti laboratoryo ken ti resulta daytoy ti paggapoan met ti rekomendasyon dagiti inhinyero.
Karaman iti duktalan dagiti structural engineers ket no marehabilitar ti pasdek wenno mademolish daytoy.
Kunana a mabalin nga agpaot ti makabulan ti panangdeterminar ti posible a pagbanagan ti pasdek nangruna ket narigat ti panangala kadagiti samples a dumalan iti eksaminasyon iti laboratoryo.
Inpetteng na a saan a mabalin a basta tarimaanen ti nasao a pasdek gapo ta agarop walo nga oras a nagpaot ti uram.
Innayon na nga iti agdama ket nasken a saan pay laeng nga agoperar ti pasdek agingga nga awan ti rekomendasyon wenno resulta ti eksaminasyon kadagiti parte ti nauram babaen kadagiti eksperto.
