LAOAG CITY – Inlungalong ni Senadora Loren Legarda ti gakat tapno ikkan ti nayon a benepisio dagiti nabayagen a miembro ti Philippine Health Insurance Corporation (PhilHealth).
Inbatadna a gagem daytoy a bigbigen dagiti pudno nga agbaybayad iti uneg ti naunday a panawen iti babaen ti PhilHealth Member Recognition Program (PMRP).
Babaen iti daytoy a programa, maaddaan ti point-based reward system no sadinno dagiti miembro a nabayagen nga agbaybayad ti premium ket makaala ti puntos.
Sakupen daytoy saan laeng ti sumaruno a bayad dagitoy no di ket karaman dagiti naibayadda iti uneg ti sangapulo a tawen sipod idi nag-enroll dagitoy iti PhilHealth, basta saan a lumabes iti sangapulo a tawen.
Inlawlawag ti Senadora, adu ti miembro ti nabayagen nga agbaybayad iti PhilHealth ngem maipapan iti panagbayad iti ospital, saan nga umanay ti maaw-awatda a benepisio.
Kunana a nasken nga ag-innovate ti PhilHealth ken saanen nga agtalinaed iti tradisional a sistema.
Iti agdama, dagiti pribado nga health insurance ket addaan kadagiti loyalty rewards ken flexible spending accounts nga ad-adda a pakabenepisiaran dagiti miembro.
