LAOAG CITY – Inlawlawag ni Mr. Alvin Luciano Ubasa, ti Social Insurance Officer I ken designated information officer ti Philippine Health Insurance (PhilHealth) ditoy probinsya ti nayun a kontribusyon dagiti miembro nga epektibo iti bulan ti Hunyo.
Segun kenni Ubasa, uppat a porsiento latta ti maikkat manipud iti sweldo dagiti miembro iti bulan ti Hunyo nga isu ti rugi ti implementasyon ti 4% a premium adjustment.
Ti nasao a panagngato ti kontribusyon ket epektibo idi pay laeng Enero 2022 ngem iti laeng bulan ti Hunyo a maipatungpal.
Nupay kasta, inalay-ayan met ni Ubasa ti amak dagiti empleado a dakkel ti maikkat iti sweldo da iti bulan ti Hunyo gapo ta agtalinaed latta nga uppat a porsiento ti maikkat.
Daytoy ket gapo ta ti kurang ket mabalin nga in-inot a bayadan agingga intono Disyembre 31, 2022.
Mainaig iti daytoy, kunana a ti nagibasaran iti panagngato ti kontirbusyon dagiti miembro ket iti 10,000 income floor ken 80,000 income ceiling.
Ti baybayadan dagiti miembro iti korporasyon nangrugi idi 2019 ket 2.75 a porsiento ken idi 2020 ket nagbalin a 3 % ken idi kuma 2021 ti pannakipatungpal ti 4% premium adjustment ngem naitantan isut gapo na nga iti bulan ti Hunyo 2022 ti implementasyon daytoy.
Kunana a kageddan met iti panagngato ti kontribusyon ket nanayunan met ti preventive benefits dagiti meimbro kas iti Konsulta no sadinno ket mabalin a magundawayan iti sadinno man a PhilHealth accredited Konsulta Providers uray outpatient dagiti kadagiti ospital ken RHU.
Karaman pay ti pagkasapulan a manayunan ti session ti hemodialysis no sadinno nga iti agdama ket 90 a daras iti maysa a tawen, kasta pay ti baro a benipisyo ket ti kaaddan ton ti Mental Health Package.
Kabayatanna, inlawlawag ni Ubasa a no saan a mabayadan ti retroactive payment agingga idi Disyembre 31, 2022 ket maipakat iti sumaruno a tawen ti penalty wenno interest iti late payment ken non-payment.
