LAOAG CITY – Plano ti DepEd ditoy siudad ti Laoag a mangiyestablisar ti nayun a pagadalan.
Segun ken ni Mrs. Vilma Eda, ti schools division superintendent iti DepEd Laoag a dagiti maiyestablisar a pagadalan ket iti Brgy. Salet-Bulangon, Lagui-Sail ken paset iti Brgy. 27, 25 ken 23.
Kuna ni Eda a kangrunaan a namunganayan ti addang ket kalpasan ti panagsasarita ti school governance and operation division.
Mainaig iti daytoy, inbatad ni Eda a nakita ti ad-ado a benepisyo a maited ti naiyun a pagadalan kadagiti agpabpabasa.
Immunan nga inbunannag ni Eda a kaaduan kadagiti agturpos iti elementarya ket agbasa ti sekondarya iti INCAT wenno INHHS, banag a makanayun iti ad-ado a gastos dagiti nagannak gapu iti adayo a pakasarakan dagiti pagadalan.
Innayun na a wagas met daytoy tapno makissayan dagiti estudyante ti INCAT ken INHHS nu sadino a kadagiti naglabas nga school year ket dupodop dagiti agad-adal.
Kabayatanna, kuna ni Eda a dagiti mismo barangay officials ti agbirbirok iti lote a mabalin a pakaiyestablisaran dagiti dagiti pagadalan.
Inbatad na a masapol met nga adda ti suporta ti LGU kangrunaan iti Sannguniang Panlungsod.
