LAOAG CITY – Inkari ni Parañaque 2nd District Rep. Brian Yamsuan nga ilungalong na ti pannakaipangato ti budget ti Presidential Communications Office (PCO) ken dagiti attached agencies na, karaman ti PTV-4, iti 2027 national budget.
Segun ken ni Yamsuan, napateg nga adda ti umdas a pondo tapno ad-adda nga agbalin nga epektibo a maipakaammo iti publiko dagiti programa ken serbisyo ti gobyerno, aglalo kadagitoy a panawen nga alisto ti panagwaras ti impormasyon iti social media.
Inbatad ni Presidential Communications Office Secretary Dave Gomez a ₱2.62 bilyon laeng ti nailungalong a 2027 budget para iti nasao nga opisina ken dagiti attached agencies na, nababbaba ti 6.68% no ikompara iti 2026 proposal.
Kabayatanna, ₱138.34 milyon laeng ti nailatang iti PTV-4, adayo iti orihinal a budget proposal na a ₱1.7 bilyon.
Awan met ti nailatang a pondo para iti IBC-13 gapu ta maikonkonsiderar daytoy para iti privatization.
Nagpanawagan ni baro a PTV-4 General Manager Lino Cayetano nga isubli ti orihinal a budget ti network.
Inpetteng na a napateg ti PTV-4 iti panangipaay ti impormasyon iti publiko ken saan a libre ti panagaramid ken panagiwaras ti content iti social media.
Kuna ni Yamsuan a malaksid iti panangisubli ti naikissay iti pondo, ilaban na pay ti nayun a budget para iti Presidential Communications Office ken PTV-4 kas miembro ti House Budget Amendments and Review Subcommittee.
