LAOAG CITY – Dakkel a tulong tapno makaliklik iti online scamming ti nayun a security feature iti online account dagiti miembro ti Social Security System (SSS).
Daytoy ti inbatad ni Mr. Christian Andrew Rillorta, Regional communications officer ti SSS Luzon North 1 Division.
Segun kenni Rillorta, masapol nga i-enroll dagiti miembro ti bank account da tapno no adda man ti loan wenno maawat a benipisyo ket ideretso laengen ti SSS iti account da.
Inlawlawag na a babaen iti nayun a security feature ket masigurado a kukua met laeng ti miembro ti na-enroll ken aktibo met laeng a maus-usar.
Kunana a maysa kadagiti feature ket ti mai-upload a ladawan no sadinno ket iggem a mismo ti miembro ti proof of account kas iti ATM ken dadduma pay. Mainaig iti daytoy, inbatad na a kadagiti met nataengan wenno marigatan iti teknolohiya ket agpatulong kadagiti mapagtalkan a tao wenno iti kapamilya tapno maliklikan a mabiktima ti scam.
