LAOAG CITY – Plano ti gobierno probinsyal a gumatang ti nayon a testing machine para iti alalisto a pannakairelease ti resulta dagiti swab samples.
Daytoy ket gapu ta umadadu dagiti swab samples a maaw-awat ti Mariano Marcos Memorial Hospital and Medical Center manipod kadagiti close contacts dagiti nagpositibo ti COVID-19 agraman dagiti naggapu iti kabangibang a lugar.
Inbatad ni Gov Matthew Marcos Manotoc nga iti agdama ket adda ti 2 nga RT PCR testing machine iti MMMHMC ken 1 a GenXpert Machine ken maiyururay ti RNA Extractor.
Kinumpirmaran ni Gov. Manotoc a saan a nadadael ti PCR machine nga adda iti nasao nga ospital.
Kunana nga inbaga ni Dr. Ma. Lourdes Otayza, medical center chief II ti nadakamat a hospital a bimmayag laeng ti pannakaparuk-at ti resulta dagiti dimmalan ti “swab testing” gapu iti panangisayangkatda ti “disinfection”.
Nupay kasta, kunana nga inpasigurado ti MMMHMC nga awanen ti backlog da iti resulta dagiti swab tests idi kalman.
