LAOAG CITY – Nakasaganan a sumabak iti baro a season ni 1-time NBA champion Jamal Murray.
Nagpirma ni Murray ti uppat a tawen a contract extension nga agbalor ti $207,845,568.
Inbatad ti Denver guard a nakakondisionen ti bagina ken panunotna para iti baro a season.
Nupay sumagmamano a daras a nalimitaran ti panagay-ayamna kadagiti naglabas a season gapu iti injury, kampante ti batikan a guard a makaipaay daytoy ti napintas nga ay-ayam inton sumaruno a season kageddan ti agtultuloy a panagensayo.
Ita a tawen ket target latta ti koponan a makagun-od ti baro a kampeonato ken nakasagana ti sibubukel a team para iti daytoy.
Naammoan nga ita a season ket makadua ni Murray iti guard position ti ari ti triple-double a ni Russel Westbrook kageddan ti pannaka-trade kenkuana idi Hulio.
Inbatad ni Murray, dakkel ti maitulong ti batikan a guard tapno maminsan manen a makasubli iti championship contention ti Nuggets pakairamanan pay dagiti dadduma a player ti koponan.
Kabayatanna, ti Nuggets ti nagbalin a kampeon idi 2023 ngem iti napalabas a tawen ket naabak ti koponan iti Western Conference finals kontra iti Minnesota Timberwolves.
