LAOAG CITY – Nadutukan ni National Bureau of Investigation Assistant Director Lito Magno kas baro a mangidaulo iti nasao nga ahensya, kasukat ni dati a chief Jaime Santiago a nagresign idi Agosto ita a tawen.
Ni Magno ken dati a nangidaulo iti NBI offices iti Northern Mindanao ken Central Luzon, ken iniggaman na dagiti major cases ti human trafficking, organized crime, ken fraud.
Maipalagip a ni Magno, ken dagiti dadduma pay nga NBI officials, ti nangidaulo iti operasyon a nagresulta ti pannakaarestar ni dati a Bamban Mayor Alice Guo idiay Indonesia.
Naiwaragawag ti pannakadutuk ni Magno kas baro a mangidaulo ti National Bureau of Investigation, sumagmamano laeng nga oras kalpasan nga inrakurak ni dati National Bureau of Investigation director Jaime Santiago a naan-anayen nga inawat ni President Ferdinand Marcos ti irrevocable resignation na nga inpasa na paylaeng idi Agosto ita a tawen.
Immuna iti daytoy, nagyaman ni Santiago kadagiti personnel ti National Bureau of Investigation iti inpaay da a suporta kenkuana kabayatan ti panagserbi na kas NBI chief, ken binalakadan na dagitoy nga itultuloy da ti napintas a trabaho da.
Maipalagip nga idi Agosto ita a tawen ket nangipasa ti resignation na kagiddan ti panangibaga na nga adda dagiti interesado iti posisyon na isut gapuna a kayatda a dadaelen ti reputasyon na.
