LAOAG CITY – Nangipasa ti irrevocable resignation ni National Bureau of Investigation (NBI) director Jaime Santiago.
Iti surat nga insumitir na ken ni Presidente Ferdinand Marcos iti babaen ni Executive Secretary Lucas Bersamin, ket dagus a bumaba iti pwesto no addan ti mainaganan a sumukat kenkuana.
Nailanad pay iti surat a saan nan a kabaelan dagiti pammerperdi ken intriga kontra kenkuana.
Nagyamanan na ti administrasyon ni Marcos ken inpasigurado na ti agtultuloy a panangsuporta na iti administrasyon na.
Innayon na nga idi inawat na ti trabaho ket inpasigurado na a dalusan na ti ahensya kontra kadagiti skalawags.
Nangrugi ti pammerperdi kenkuana idi nagipasa ti courtesy resignation kadwa na ti sumagmamano pay nga opisyal ti gobyerno gapu metlaeng iti pammilin ni Pres. Marcos.
Kuna na pay nga adda dagiti mangperperdi kenkuana gapu ta adda dagiti interesado iti pwesto na.
Ni Santiago a dati a trial court judge, prosecutor ken pulis ti Maynila ket nadutukan kas NBI Chief idi Hunyo ti napalabas a tawen.
