LAOAG CITY – Nabuwak dagiti kameng ti media ken dadduma pay a personalidad kalpasan ti napasamak a tension iti uneg a mismo ti senado no sadinno nga adda ti nangngegan a nagsasaruno a putok ti paltog ita a rabii, Mayo 13.
Napasamak daytoy kalpasan nga adda ti report a maipagarop a maarestaren ni Senador Ronald Bato dela Rosa.
Saan a mailadawan ti pungtot dagiti kameng ti senado iti napasamak no sadinno nga ibilang ni Senate President Alan Peter Cayetano a panagatake iti kangatoan a pagpanpandayan linteg iti kongreso.
Naamoan a kabayatan ti tension ket adda paylaeng dagiti kameng ti senado iti uneg gapu ta iyur-uray da ti pannakaisumitir ti Articles of Impeachment kontra ken ni Vice President Sara Duterte.
Inpasingked met ni Senate President Cayetano nga adda iti nasayaat ken natalged a sitwasyon ni Senador dela Rosa kalpasan ti napasamak a tension iti uneg a mismo ti senado.
Mainaig iti daytoy, naglikudan ni National Bureau of Investigation (NBI) director Melvin Matibag nga adda ti in-deploy da nga ahente da iti senado kalpasan ti nagsasaruno a putok ti paltog.
Inlawlawag ni Matibag nga adda ti tallo nga aldaw a fellowship event nga inatendaran dagiti opisyal ti National Bureau of Investigation iti maysa nga hotel.
Inyistorya pay ni Matibag a timmawag kenkuana ni Senador Loren Legarda tapno makisarita a papanawen na dagiti ahente ti National Bureau of Investigation iti senado.
Nupay kasta, kuna ni Matibag nga inlawlawag na ken ni Senador Legarda nga awan ti ahente da iti senado ken inbilin na a paimbestigar ken patiliw da dagiti nagpapaputok ti paltog.
Kabayatanna, insigida met a nagturong da Department of the Interior and Local Government Secretary Jonvic Remulla ken Philippine National Police chief Jose Melencio Nartatez iti senado tapno maalay-ayan ti tension.
Inpasigurado ni Remulla nga awan ti naireport a nadangran iti tension, ngem saan pay a masinunuo no siasinno dagiti nagpapaputok ti paltog iti uneg ti senado.
