LAOAG CITY – Tutukan ita ni National Bureau of Investigation Director Jaime Santiago ti madagdagus a panagisyu dagiti National Bureau of Investigation clearances ken ti pananglaban kadagiti cybercrime syndicates.
Inbatadna a kalikagumna a maisubli ti talek ti publiko iti National Bureau of Investigation nga isu met ti normal nga ipatpatungpal dagiti baro a nagtugaw nga hepe kadagiti nagduduma nga ahensia.
Inadmitirna nga agpapan iti daytoy a gundaway ket saan pay laeng nga agsardeng dagiti online scammers isu a gagemna a maipasardeng dagiti operasyion dagitoy.
Maipalagip a ni Santiago ti dinutukan ni Presidente Ferdinand Marcos Jr. kas kasukat ni Medardo Delemos a nagretiron.
Sakbay a nagbalin a National Bureau of Investigation Chief ket dati daytoy a retirado a huwes ken pulis.
Nagturpos daytoy ti Bachelor of Science in Criminology iti Philippine College of Criminology idi 1988 ken naipasana iti abogasia iti Manuel L. Quezon University idi 1993.
Nagbalin a pulis daytoy iti Western Police District manipod iti 1979 agingga 2000.
Nagbalin nga Acting Executive/ Presiding Judge ti Regional Trial Courts ti Manila ken Tagatay ken dati a Metropolitan Trial Court Judge ti Manila City.
Nagserbi pay daytoy kas Assistant Prosecutor ti Department of Justice manipod idi Oktubre 2003 agingga Disiembre 2006.
