LAOAG CITY – Ginutigot ti National Bureau of Investigation (NBI) ti negosyante a ni Atong Ang a sumukon kadagiti otoridad iti baet ti ad-adda pay a pannakapaiget ti pananganop kenkuana iti uneg ken ruwar ti Metro Manila.
Daytoy ket kalpasan ti naisyu nga arrest warrant kontra kenkuana ti Sta. Cruz Laguna Regional Trial Court (RTC) mainaig iti 15 counts ti kidnapping ken serious illegal detention ken 4 counts ti kidnapping with homicide mainaig iti panagpukaw ken pannakatay dagiti mammallot.
Segun ken ni National Bureau of Investigation Acting Director Angelito Magno, awan pay ti surrender feelers manipod ken ni Ang ngem no sumuko ket nasaysayaat tapno mapaalisto ti pannagna ti kaso.
Mainaig iti daytoy, inrakurak ti NBI official a napinpintas no sumuko ni Ang tapno maikkan ti gundaway a mangpaneknek nga inosente daytoy kas ti ipetpetteng ti abogado na.
Iti baet met ti karit iti panangarestar ken ni Ang gapu iti kalawa ti resources na, inpasigurado ti NBI official a saan da nga agsardeng kadwa da ti dadduma pay a law enforcement units agingga a saan da a makemmeg ti negosyante.
