LAOAG CITY – Adda ti napigsa nga indikasyon a saan pay a nakaruwar ti Pilipinas ni Senador Ronald “Bato” dela Rosa.
Segun ken ni National Bureau of Investigation (NBI) Director Melvin Matibag, adda ti sursuruten da nga impormasyon wenno lead mainaig iti possible a lokasyon ti senador.
Inlawlawag ti National Bureau of Investigation Director a marigatan a makaruwar ti Pilipinas ni dela Rosa gapu ta adda ti 132 a pagilian a miyembro ti International Criminal Court (ICC).
Ni dela Rosa ket agdama a sumangsango ti arrest warrant manipod iti International Criminal Court kalpasan a nainaganan kas maysa kadagiti maipagarop a co-perpetrators ni dati a Presidente Rodrigo Duterte iti kaso a crimes against humanity gapu iti rinibo a pimmusay iti babaen ti war on drugs ti napalabas nga administrasyon.
Kabayatanna, inpaganetget manen ni Matibag nga awan pay ti naawat da a nayun nga arrest warrant manipod iti International Criminal Court.
Sungbat daytoy ti NBI Director kalpasan a nasaludsud ti maipanggep iti maibagbaga a naiparuk-at nga arrest warrant kontra ken ni Sen. Bong Go.
