Naiget a kinontra ni National Bureau of Investigation Director Angelito Magno ti rakurak ni Department of the Interior and Local Government Secretary Jonvic Remulla nga adda dagiti sumagmamano nga ahente ti National Bureau of Investigation a maipagarup a konektado ken ni gaming tycoon Charlie “Atong” Ang.
Inbatad ni Magno nga awan ti ammona nga impormasion iti agdama nga adda dagiti tauhan ti National Bureau of Investigation nga agserserbi a bodyguard ni Ang.
Nupay kasta, inpasigurado ti National Bureau of Investigation chief a makikoordinar isuna ken ni Secretary Remulla tapno maala dagiti nagan dagiti ahente a rumrummuar nga adda ti pakainaiganda iti nasao a negosiante.
Maipalagip nga inrakurak ni Secretary Remulla nga adda dagiti sumagmamano a tauhan ti National Bureau of Investigation ti maipagarup a nagserbi a bodyguard ni Ang sakbay pay a nagbalin a Justice Secretary ti kabsatna a ni Ombudsman Jesus Crispin Remulla.
