LAOAG CITY – Inbatad ti National Bureau of Investigation (NBI) a nagkiddaw iti International Criminal Police Organization (Interpol) a mangisyu ti red notice kontra kenni dati nga Ako Bicol Party-List Representative Zaldy Co.
Segun kenni spokesperson Palmer Mallari, sipud pay idi Nobiembre 23 ket nagkiddaw dan para iti red notice ngem manarimaan pay laeng ti evaluation ti Interpol.
Ti red notice ket kiddaw iti law enforcement iti intero a lubong a mangtunton ken mangarestar iti indibidual a wanted iti requesting member country wennot international tribunal.
Mainaig iti daytoy, kuna ni Mallarti nga adda ti impormasyon da no sadinno ti naudi a lokasyon ni Co ngem saan nan nga indetalye pay tapno saan a makompromiso ti sumaruno nga addang da.
Ummunan a nakikoordenar ti Department of the Interior and Local Government (DILG) iti Portugal gapo ta mapapati nga addaan ti Portuguese passport ni Co.
Kunana a no pudno nga adda ti Portuguese passport ni Co ket agbalin a mas komplikado ti sitwasyon.
Maipalagip nga indeklara ti Sandiganbayan ni Co kas pugante ken inbilin na ti pannakakanselar ti pasaporte na gapo iti malversation ken graft charges nga adda ti pakainaigan na iti P289 million substandard road dike project idiay Oriental Mindoro.
