LAOAG CITY – Paayaban ti National Bureau of Investigation (NBI) dagiti uppat nga abogado a mapapati a nairaman iti ‘honeytrap’ wenno plano nga i-frame up ni Executive Secretary Ralph Recto tapno agparang iti nasao nga ahensia inton Agosto 14.
Saan a nainaganan ni NBI Director Melvin Matibag dagiti uppat nga abogado ngem kinunana a naggapu dagitoy iti maymaysa a law firm iti Ortigas Center.
Segun iti hepe ti NBI, insagana dagiti abogado dagiti affidavit para iti mapapati nga scheme.
Innayon pay ni Matibag a dadakkel a personalidad dagiti kliyente dagiti uppat nga abogado. Kunana a dua kadagiti abogado ti nalatak ken senior partners idinto a dagiti dua pay ket rookie lawyers laeng.
Immuna metten a nangipaulog ti NBI iti subpoena kada dati a kongresista Jing Paras ken Leandro Leviste a mapapati nga adda iti likudan ti destabilization plot kontra ken ni Recto.
Malagip a sumagmamano nga indibidual ti naisalbar ti NBI iti naiplano nga entrapment operation. Inbutakta ti sumagmamano a biktima a maipagarup nga intukon ni Paras a bayadanna ida tapno agaramidda kadagiti estoria ken agpirma iti affidavit a kasukat ti kuarta.
Nupay kasta, agpada a naglikudan da Leviste ken Paras dagiti alegasion kontra kadakuada.
